ХХ зууны манлай сэтгүүлч, зохиолч Лодонгийн Түдэвийн мэндэлсний 85 жилийн ойд

Монгол Улсын Үндэсний номын сан Хөдөлмөрийн баатар, Ардын уран зохиолч, Соёлын гавьяат зүтгэлтэн, Төрийн шагналт, доктор, профессор, ХХ зууны манлай сэтгүүлч, зохиолч Лодонгийн Түдэвийн мэндэлсний 85 жилийн ойд зориулан их хүмүний бүтээсэн оюуны өв санг мөнхжүүлэн хойч үедээ үлдээх зорилгоор санамж өгөх ном зүйн бүртгэлийг эрхлэн хэвлүүллээ. 

МУҮНС-ийн Мэдээлэл аргазүй эрдэм шинжилгээний хэлтсийн ном зүйч Х.Ундрах тус бүртгэлийг эмхэтгэн боловсруулж Л.Түдэвийн монгол гадаад хэл дээр бичигдсэн бие даасан зохиол бүтээлүүдээс гадна "Монголын уран зохиолын дээжис” 108 боть, гадаад дотоодын ном товхимол, тогтмол хэвлэлд хэвлэгдсэн болон хамтран оролцсон, хянан засварласан ном зохиол, түүнчлэн зохиолчийн тухай эрдэмтэн мэргэд, зохиолч судлаачдын бичсэн найруулал, захидал, хэлсэн үг зэргийг багтаажээ.

 Энэхүү номзүйн бүртгэл нь үе үеийн уншигч, судлаач, номын санч-мэдээллийн ажилтны цаг завыг хэмнэх лавлагаа-мэдээллийн гарын авлага болж, Л.Түдэв судлал хийгээд монголын утга зохиол судлалын эрдэм шинжилгээний судалгааг өргөжүүлэн тэлэхэд зохих хувь нэмэр оруулна гэдэгт итгэлтэй байна.