Монголчууд судар хийх модон хайрцгийг шогол хэмээн нэрлэдэг. Судрын хуудсыг нугаларч үрчийхгүй, гадны гэмтлээс хамгаалахын тулд тухайн судрын хэмжээнд таарсан шогол хийдэг. Шоголыг хус, зандан зэрэг сайн чанарын модоор хийдэг бөгөөд голдуу хүрэн буюу улаан өнгөөр будаж, гадна талыг сийлбэр, зүмбэрээр чимэглэн, төрөл бүрийн хээ угалзаар гоёдог байжээ. Мөн маанийн 6 үсгийг төвд, ланз, соёмбо үсгээр бичин, алтан өнгөөр будаж чимэглэсэн ч бий.
